Computer Village

Computer Village yin ahi nuyizan lẹnunnuyọnẹn nudọnamẹ po hodọdopọ tọn de po, (Information and Communications Technology)- (ICT) he tin to lẹdo de he nọ yin yiylọ dọ Otigba mẹ, e tin to Ikeja, enẹwẹ tatọ-tonọ ayimatẹn Awọnlin tọn to otò Naijilia tọn mẹ. Ahi lọ wẹ yin ahi nuyizan ICT tọn he klo hugan to Aflika, e yin ahi agbàwhinwhlẹn tọn de he to aṣẹpipa Computer and Allied Products Dealers Association of Nigeria (CAPDAN) tọn glọ

Gbọnvona nuyizan ICT tọn lẹ sisa, alokan lẹ po ọdinatẹ lẹ po sọ nọ yin vivọjlado to ahi lọ mẹ. Vọjlado ọdinatẹ po alokan lẹ po tọn sọgan yin to homẹ kavi gbangba sọgbe lehe e gblé sọ.

Na lehe ajọ́ voovo lẹ nọ yin wiwa to ahi lọ mẹ do wutu, e hùn dotẹnmẹ dote na ọdinatẹẹ po alokan po jladotọ he yọn azọ́n ganji lẹ nado nọ nado jla ọdinatẹ lẹ po alokan lẹ po do podọ nado wàjọ́ hẹ ajọwatọ nuyizan ICT tọn, podọ ehe hùn dotẹnmẹ azọ́n voovo tọn na yé. Ahi lọ nọ yin hùnhùn to azán lẹpo ji, adavo to Sẹgbe lẹ po gbọjẹzan devo lẹ po. Lehe ajọ́ voovo lẹ nọ yin wiwa to azán dopodopo ji do ko dọn ayidonugo ajọwatọ devo lẹ po ajọwatọ nuyizan ICT tọn lẹ tọn lẹdo Aflika blebu pe podọ ehe zọn bọ ahi lọ sọ gbloada dogọ bọ gbẹtọ he nọ wá to azán dopodopo ji sọ sù dogọ, ehe sọ hẹn nukọnyiyi wá na Ayimatẹn Awọnlin tọn to ajọ́liho. Fie ahi nuyizan ICT tọn lẹ tọn tin te to ojlẹ de mẹ wayi wẹ Ogunlana Drive, Surulere, enẹwẹ to owhe 1990 lẹ gblamẹ, fie ahi lọ te to alọnu din, to ojlẹ de mẹ wayi, yin fie gbẹtọ lẹ nọ nọ̀ paa podọ fie azọnwatẹn kleun kleun lẹ tin te. To agọe, tohọluduta Awọnlin tọn tindo lẹndai lọ nado sẹtẹn na ajọwatọ he hugan 3000 do fidevo.

Lehe onú lẹ nọ yin wiwà do to ahi lọ mẹ

Ahi lọ yin ahi dagbe de he mẹ ajọwatọ depope ma nọ dọ dandan dọ akuẹ lé wẹ yè nado sà kavi họ̀ nude to ahi lọ mẹ. Gbẹtọ susu lẹ wẹ nọ wá họ̀ kavi sà nudepope he yé jlo sọgbe hẹ akuẹ yé tindo to alọ mẹ po nugopipe yetọn po. Aliglọnnamẹnu depope ma tin na yigọyigọ bibasi to ahi lọ mẹ, ehe nọ zọn bọ ninọmẹ núlẹ tọn nọ to didiọ sọn ojlẹ de mẹ jẹ devo mẹ. Núhọ̀tọ po núsatọ nuyizan ICT tọn lẹpo wẹ tindo oyọnẹn he pe gando akuẹ núlẹ tọn go, podọ gando lehe nusisa de yọn ganji do sọ.

Homọdọdonugo lẹ

Mẹsusu to otò lọ mẹ wẹ ko mọhodọdo núwiwa delẹ go to ahi lọ mẹ, susu to yé mẹ wẹ ko tindo numimọ mẹhodu tọn na yé jẹ alọ mẹhodutọ lẹ tọn mẹ wutu, na gbẹtọ nọ sù to ahi lọ mẹ taun wutu, mẹhodutọ ehelẹ nọ yí dotẹnmẹ-hundote ehe zan nado homẹdu, yé nọ sà nuyizan he ma yọn lẹ taidi alokan po nuyizan devo lẹ po. Whlasusu wẹ mẹsusu ko dọho gando lehe alokan he yin finfin lẹ nọ yin sisa to ahi lọ mẹ do, ṣigba nuyiwa ehelẹ nọ yin wiwa gbọn ajọwatọ he ma tindo kandai depope to ahi lọ mẹ lẹ dali, yé ma nọ tindo ṣọfu yẹtọn titi lẹ, kakatimọ yé nọ nọte to afọgbọntẹn lẹ kavi to moto de mẹ po mọmọ po. Ajọwatọ lẹ to ahi lọ mẹ yin mimá do ogbẹ́ awe ji, dehe tindo kandai lẹ podọ dehe ma tindo kandai lẹ, dehe ma tindo kandai lẹ nọ sanú to aliho depope he jlo yé mẹ matin kandai depope. Yewlẹ ṣẹnsẹn wẹ sẹ́nhẹngba lẹ nọ sù te hugan na mẹdekannujẹ he yé tindo wutu. Na ehe tọn wutu, afọdide delẹ to yinyin zize to agọe nado doalọtena ajọwatọ he ma tindo jlọjẹ lẹ.

Yẹdide-sẹdótẹn

• 
  Computer Village to whenue e yin pinpọn sọn aga.
• 
  Apadewhe Computer Village tọn.
• 
  Ajọjijla alokan apomẹ tọn TECNO he diyin taun lọ tọn.
• 
  Ajọjijla alokan apomẹ tọn XIAOMI tọn to Computer Village.
• 
  Zannu oflin tọn de sẹpọ lẹdo "Under Bridge" tọn.
• 
  Ṣọfu lẹ, Ganhiho, po fie ponọ lẹ nọ nọte do po sẹpọ lẹdo "Under Bridge" tọn.
• 
  Alidohiamẹnu Ponọ-pá he tin to Computer Village tọn.