National Youth Service Corps

Ogbẹ́ Anadenanu tọn na jọja he jlo na sẹn otò Naijilia tọn he yin alọdlẹndo taidi (The National Youth Service Corps) (NYSC). Ehe yin tito-to-whinnu dé he yin awuwlena gbọn tohọluduta lẹ dali na jọja lẹ, e sọ yin tito dé he ahọlu zedai na jọja he hiawe to wehọmẹ Alavọ po wehọmẹ daho devo lẹ po to togbo Naijilia tọn mẹ. Nuhewutu tito lọ do yin zizedai wẹ na jọja egbezangbe tọn lẹ nido wlebona nukọnyiyi otò otọ́ yetọn tọn, dile etlẹ yindọ awhanfuntọ togbo Naijilia tọn ma nọ gbidikọna mẹlẹ nado kọnawudopọ hẹ yé nado funawhan. Amọ to owhe 1973 mẹ, ahọlu togbo Naijilia tọn dè osẹn dé tọn dọ weplọntọ he ko yi gbedewema to wehọmẹ alavọ po wehọmẹ daho devo lẹ po dona tindo mahẹ to mẹdeyiyidosanvọ na otò lọ mẹ tọn to Naijilia na owhe dopo poun. Dawé Ahmadu Ali wẹ yin anadenanutọ tintan ogbẹ́ ehe tọn bo deanana jọja he jlo na sẹ̀n lẹ kaka jẹ 1975. Mẹhe tin to otẹn lọ mẹ dai wẹ Director- General Enẹ Awhangan Brig. Gen. Sule Zakari Kazaure.

NYSC National Headquarters in Abuja

Lehe e bẹjẹeji do

NYSC yin didoai to azán fọtọnnukunatọ̀ntọ, osun atọ́ntọ, [[[owhe]] 1973 tọn taidi aliho dagbe dé nado hẹn alọkọ̀ndopọ po vọjlado po wá togbo Naijilia tọn mẹ to awhan nuglọ tọn funfun godo. Osẹ́n lọ yin nina sọgbe hẹ osẹ́n 24 he dọdọ, na nukọnyiyi po gbenọpọ nido tin to jọja he wá sọn otò voovo mẹ lẹ ṣẹnṣẹn to togbo Naijilia tọn mẹ.

Lehe ye to azọn wa do

Jọja hẹ yin mẹdezejotọ lẹpo nọ yin didohlan fihe ye na sẹn otò otọ́ yetọn tọn te gbọnvona otò yetọn titi lẹ tọn nado kọnawudopọ hẹ hagbẹ yetọn he wá sọn awa voovo lẹ mẹ. Afọdide ehe ahọlu ze nado gọalọ nado hẹn pọninọ wá podọ na yé ni do yọn yẹyi he tin to aṣa mẹdevo lẹ tọn mẹ. Yé nọ na yé oplọn po awuwledai na jọja he jlo na sẹn lẹ na osẹ̀ atọ̀n to nọten awhanfuntọ lẹ tọn mẹ, to osẹ̀ atọ̀n lọ godo, yé na basi hunwhẹ tintọ́n tọn na yé, Enẹgodo yé na yin didohlan fie yé na sẹ̀n otò otọ́ yetọn tọn te, fie yé nọ ylọ dọ (PPA). Finẹ wẹ yé na wazọn otò otọ́ yetọn sinsẹn tọn te taidi ahọluzọnwatọ dé, bo na nọ dè azan dé to osẹ̀ dopo gblamẹ nado wazọn nukọnyiyi nọtẹn yetọn lẹ tọn, To ehelẹ wiwa na owhe dopo godo wẹ ahọlu na jo yé bo na na yé gbedewema otò otọ́ mẹtọn sinsẹn tọn.

Ale tito lọ tọn

Nuplọntọ he ṣẹṣẹ tọ́n sọn wehọmẹ daho ma tindo lẹblanulọkẹyi lọ nado din azọn kavi wazọn to ahọlu glọ kavi azọnwhe mẹdetiti tọn eyin e ma ko fó nubiọtomẹsi otò otọ́ mẹtọn sinsẹn tọn na owhe dopo kavi mọ̀ wekanhlanmẹ yí sọn ahọlu dè. Mọ dopolọ, mẹhe to sinsẹn otò otọ́ mẹtọn tọn tindo lẹblanulọkẹyi lọ nado plọnnu gando aṣa otò devo he e yin didohlan lọ tọn.

Linlẹn ogbẹ́ anadenanutọ otò otọ́ mẹtọn tọn sinsẹn tọn

Todowhinnu yin bibasi na linlẹn ogbẹ́ anadenanutọ lẹ tọn debọdodego do owe osẹ́n tọn sọha Kandewidopotọ tọn (Decree No.51) azan wí ẹnẹtọ, osun atọntọ owhe 1993 tọn do le:

1. Nado dike jọja togbo Naijilia tọn lẹ nido tindo oyọnẹn gando mẹdeyiyidosanvọ to azọn he yin zizedo alọmẹ na yé po ahun he wleawufo nado gọalọ po Nugbonọyinyin po to fidepope he mọ yedelẹ te.
2. Nado plọn lehe ye dona nọ do sisi hia na aṣa akọ̀ devo tọn gbọn nina yé lẹblanulọkẹyi lọ nado kọnawudopọ hẹ mẹhe aṣa yetọn gbọnvo na yetọn lẹ.
3. Nado whẹn po walọ mẹ́dezewhe tọn he ye ko plọn to whenue ye to otò otọ́ yetọn tọn sẹn topọmẹ hẹ mẹhe wá sọn akọ̀ devo mẹ lẹ na gbekọndopọ nido tin to togbo Naijilia tọn mẹ.
4. Nado wleawuna jọja lọ lẹ nado tindo jidide do yede go dogbọn azọ́n pinplọn he na dike yé ni ganjẹ yedelẹ go.
5. Nado dike yé ni tindo mahẹ to nukọnyiyi tito ajọ́wiwa togbo Naijilia tọn. Bo sunkundona wangbẹnamẹ na gbekọndopọ nido tin to togbo Naijilia tọn mẹ.
6. Na owanyi po alọ́kọ̀ndopọ́ po nido tin to togbo Naijilia tọn mẹ.
7. Na jọja lọ lẹ nido kọnawudopọ hẹ azọnwatọ devo lẹ to ayimatẹn he gbọnvona yetọn. Na azọ́n wiwadopọ jọja] lọ lẹ tọn nido gọalọna nukọnyiyi otò lọ tọn to whedepope he nuhudo etọn tin.
8. Na pọninọ nido tin to kọja lọ lẹ ṣẹnṣẹn to togbo Naijilia tọn. Nado dike jọja togbo Naijilia tọn lẹ ni tindo akọndonanu po pọninọ po na hagbẹ yetọn he yin sinsẹnnọ devo lẹ.
9. Na pipa nido tin na jọja lọ lẹ nado dín azọ́n kavi wazọn to fidepope to togbo Naijilia tọn mẹ to owhe dopo he yé sẹ̀n otò otọ́ yetọn tọn godo, podọ na nukọnyiyi azọnwatọ lẹ tọn to togbo Naijilia tọn.
10. Na mẹyimẹ dó azọnmẹtọ nido gbeje jọja he ko sẹn otò otọ́ etọn tọn na owhe dopo bo yi dó azọ́nmẹ mahopọnna otò kavi akọ̀ he mẹ e wá sọn.

Avunnukundiọsọmẹnu

Afọzize ogbẹ́ he nọ deanana jọja he na sẹn otò otọ́ yetọn tọn ko pehẹ avunnukundiọsọ́mẹnu sọn jọja lọ lẹ si na akuẹ́ he ma pemẹnu he ahọlu to susu na yé podọ ogbẹ́ jọja lọ lẹ tọn nọ nuha na ogbẹ̀ yetọn tin to owu mẹ wutu podọ na hunyanhunyan sinsẹn tọn gọna akọ̀ tọn, po tonudidọ tọn po wutu. Hodọtọ akonka lẹ basi opli nado dọ lehe ye na hẹnalọdote na hagbẹ anadenanutọ jọja he jlo na yi sẹ̀n lẹ tọn do, nado basi hihọ he jẹ̀ na togbo Naijilia tọn, mẹsusu dọ dọ ogbẹ́ lọ gbọawupo na tito he yé zedai, bo mọ tito lọ taidi ogbẹ̀ po nutindo gbẹtọ tọn hinhẹn gú po.