Joke Silva

Joke Silva

Joke Silva he yin jiji to azan gbanewhèdopotọ, Zosun owhè 1961 yin ayihundatọ, anadenanutọ́ podọ ajọwatọ dé. É yi wehọmẹ alavọ tọn University of Lagos po Webber Douglas Academy of Dramatic Art po to London. Joke Silva bẹ ada tangan dè hẹn to whenuena é pè hẹ ayihundatọ Colin Firth po Nia Long po to sinimọto he yin babasi to oto Brítánì po Canada po he hosọ etọn yin The Secret of Laughter of Women. To owhè 2006, e yin dide taidi yọnnu he yọn hugan aihunda hugan na azọn he e wa to sinimọto Women's Cot mẹ. Enẹgodo yé sọ na ẹn gigopanamẹnu to owhè 2008 na ada he go e penukundo taidi onọ daho (Grand Mother) to sinimọto White Waters mẹ. Joke Silva wlealọ po ayihundatọ Olu Jacobs po. Ye omẹ awelẹ kọngbedopọ bo dó azọnwhe Lufodo Group te. Azọnwhe lọ nọ penukundo sinimọto babasi po nupinplọn nado lẹzun aihundatọ dagbe po go. Joke Silva yin anadenamẹtọ to azọnwhe lọ. E wọ dopolọ wẹ sọ yin dowatọ anadenanutọ́ na Malete Film Village to kọndopọmẹ hẹ wehọmẹ alavọ Kwara State University tọn po. To azan gban ewhè dopo, Zosun owhè 2014, é mọ gigopanamẹnu he klo hugan to oto Naijilia tọn mẹ Order of the Federal Republic yi to tatọ-tonọ Abuja tọn.

Otań gbẹzan etọn tọn

Joke Silva yin jiji to Awọnlin dó whẹndo Amaro he dó ovi ẹnẹ tọn mẹ. Onọ etọn Adebimbola Silva, he yin dotozọnwatọ ku to Liyasun, owhè 2015. Otọ etọn Emmanuel Afọlabi Silva yin whèdatọ dai tọn. Joke Silva yi wehọmẹ daho Holy Child College to Awọnlin. To whenue Joke to wehọmẹ alavọ tọn, e kọnawudopọ po ogbè dè he tindo aihunkantọ Bode Osanyin po hansinọ Stella Monye po. Joke Silva yi gbọjẹ na whèdopo sọn wehọmẹ, bo yi whenu lọ dó bẹ azọn aihundida tọn. Enẹgodo Silva sẹtẹn yi yovotomẹ Glẹnsi tọn fie é plọn sinimọto te, to Webber Douglas Academy of Dramatic Art te to tatọ-tonọ London tọn. To whẹwhẹ whenu mẹjitọ etọn lẹ jẹagọ dó nudide etọn taidi aihundatọ dè,ṣigba to whenu pẹde godo,yé kẹaloyi azọn lọ̀ na kọdetọn dagbe he Joke to didó to azọn lọ mẹ. To ojlẹ pẹde godo, nulẹ ma sọ to yiyi ganji dile Joke jlo dó, ehe wẹ zọn bọ e dó lẹkọ dó wehọmẹ nado plọn Glẹnsigbe to wehọmẹ alavọ tọn University of Lagos to Awọnlin.

Azọn Aihundida etọn tọn

Joke Silva ko sọawuhia to sinimọto Glẹnsigbe po Ayọgbe po susu mẹ. Dopo to sinimọto glẹnsigbe tọn he mẹ e sọawuhia te to owhè 1990 wẹ Mind Bending. To owhè 1993, e sọawuhia to Owurolojo mẹ, enẹgodo Violated to owhè 1995. To owhè 1998, e kọnawudopọ po Colin Firth po Nia Long po to sinimọto he yin bibasi to Brítánì po Canada po mẹ he hosọ etọn no yin The Secret Laughter of Women fie e zan tẹnmẹyinkọ Nene te. To owhè 2002, Joke Silva sọawuhia po Bimbo Akintola po to sinimọto Keeping Faith mẹ. Akintola na pipa susu Joke Silva bọ e dó yinkọ na ẹn sọ Aunty Joke na alọgọ he e basi na Akintola to aihundida sìn azọn mẹ. To owhè 2002 dopolọ, Joke Silva po asu etọn Olu Jacobs po nọpọ dó basi sinimọto he ye ylọ dọ The kingMaker.

Gigopanamẹnu he é móyi

To Kọ́yànsun owhè 2012, azọnwhe he nọ penukundo amasin po osẹn gbígba po go United Nations Office on Drugs and Crime de Joke Silva taidi Afọzedaitọ yinkọ dagbe azọnwhe lọ fọn. Silva zan owhè atọ̀n po azọnwhe lọ po.

Otàn Yidogọ Gbẹzan etọn tọn

Joke Silva wlealọ hẹ ayihundatọ numimọnọ Olu Jacobs, ye sọ ji ovì Awe. Ye omẹ awelẹ pe to owhè 1981 to aihundatẹn National Theatre tọn to awọnlin whenue yé to hunwhẹ jijizan otògbo Naijilia tọn basi. Sinimọto delẹ he mẹ e sọawuhia te wẹ:

1. Laughter of Women (1999)
2. Last Wedding (2004)
3. Women's Cot (2005)
4. 30 days (2006)
5. Eewo Orisa (2007)
6. The Secret
7. The Royal Hibiscus Hotel (2017)
8. Potato Potahto (2017)
9. Chief Daddy (2018)
10. Diamonds in the Sky (2019)
11. Two weeks in Lagos(2019)