Fernán Caballero

Fernán Caballero

Fernán Caballero (24 Awewesun 1796 – 7 Lidosun 1877) yin yinkọ devo de he yè do nọ ylọ otanwe-kantọ Spain-nu de he nọ yin Cecilia Francisca Josefa Böhl de Faber y Ruiz de Larrea. E yin ovi wekantọ Germany-nu de he nọ yin Johann Nikolaus Böhl von Faber tọn, podọ onọ etọn yin wekantọ Spain-nu de he nọ yin Frasquita Larrea. E kẹalọyi yinkọ he yè nọ ylọ ẹ ehe to gbétatò he to lẹdo Ciudad Real tọn de mẹ.

Gbẹzan

E yin jiji to Morges to otò Switzerland tọn mẹ, Cecilia Francisca Josefa Böhl und Lütkens y Ruiz de Larrea yin viyọnnu Johann Nikolaus Böhl von Faber tọn, yèdọ ajọwatọ Germany-nu de he wá sọn Hamburg, bo nọ̀ Spain na ojlẹ dindẹn, bo wá dà Frasquita Larrea he yin tòvi Cádiz tọn , podọ e yin yinyọnẹn gbọn Spain-nu he yin nuplọntọ wekinkan tọn lẹ dali taidi mẹhe basi vọjlado na owe lọ, Floresta de rimas antiguas castellanas (1821–1825), podọ na owe lọ, Teatro español anterior a Lope de Vega (1832). Hamburg wẹ Fernán Caballero yì wehọmẹ te taun, e basi dlapọn yì Spain to 1815, podọ to 1816 e dà Antonio Planells y Bardaxi. To owhe he bọdego mẹ, Planells yin hùhù to aihundida de whenu, podọ to 1822 asuṣiọsi lọ dà Francisco Ruiz del Arco, Marqués de Arco Hermoso, he yin awhànfuntọ to awhànpa whédo Spain-nu lẹ tọn de mẹ.

To okú asu etọn Arco Hermoso tọn to 1835 godo, Fernán Caballero pehẹ ninọmẹ awusinyẹn tọn lẹ, podọ to nue ma pe owhe awe godo, e dà Antonio Arrom de Ayala, yèdọ mẹde he whè do e to owhe mẹ taun de. Arrom wá yin dide taidi afọzedaitọ otò tọn to Australia, e doalọ to ajọ̀ voovo lẹ mẹ bo mọ akuẹ; ṣigba whẹsadokọnamẹ delẹ wá zọn bọ e hù ede to 1859. Owhe ao jẹnukọnna nujijọ ehe, yinkọ Fernán Caballero tọn ko diyin taun to Spain taidi mẹhe kan owe lọ La Gaviota. E ko basi zinjẹgbonu owe lọ Sole (1840) tọn, he sinai do owanyi ji, podọ wekinkan jọun La Gaviota tọn yin kinkan do Flansegbe mẹ. Otanwe ehe, he yin lilẹdo Spanish-gbe mẹ gbọn José Joaquín de Mora dali, yin zinzinjẹgbonu vude vude gbọn linlinnamẹwe El Heraldo (1849) dali, podọ mẹsusu yiwanna. Eugenio de Ochoa, he yin agọjẹdonutọ he diyin taun to ojlẹ lọ mẹ, do godonọnamẹ etọn hia na linlẹn he mẹsusu tindo dọ owe lọ yọ́n taun, podọ e sọ wá la dọ wekantọ lọ gán yin yiyijlẹ do Walter Scott go to wekinkan mẹ. Owe Spain tọn owhe kanweko 19tọ tọn devo depope ma tin he yin ayidego taun lẹdo aihọnpe podọ to ojlẹ kleun mọnkọ gblamẹ. E yin lilẹdo ogbè Europe tọn susu lẹ mẹ, bọ mí sọgan dọdọ gbọnvona owe lọ La Familia de Alvareda (he yin kinkan, to tintan whenu, do German-gbe mẹ), ewọ wẹ yin azọ́n wekantọ lọ tọn he yọ́n hugan. Owe etọn devo he sọ diyin pẹẹde lẹ wẹ Lady Virginia po Clemencia po; ṣigba otàn kleun he hosọ etọn yin Cuadros de Costumbres vivi eyin yè na pọ́n aliho he mẹ e kàn ẹn do, podọ Una en otra po Elia o la Espana treinta años ha po yọ́n taun na aliho he mẹ otàn lọ hẹnmẹ lẹnayihamẹpọn do. E na vẹawu pẹẹde nado kudeji dọ Fernán Caballero yin wekantọ azọ́nyọnẹntọ taun de, amọ họnwun dọ e yin mẹde he nọ dọ otàn ganji de podọ dọ e tindo aliho wekinkan tọn dagbe de he jẹ hẹ lẹndai etọn. E wá Spain to ojlẹ he yọ́n taun de whenu, whẹpo aliho nuyiwa tọn yọyọ lọ jẹ nuyiwa do hoho lọ ji, podọ e wá po nunina jọwamọ tọn dagbe ayidonugo tọn de po, e ma yin enẹ kẹdẹ, e sọ tindo nunina numọdohlan nukọn tọn. E basi yọ́n-na-yizan ale he tin to emẹ nado yin jonọ de po tòvi de po tọn.

To zinjẹgbonu etọn he gbọngodo lẹ mẹ, e zinnudo nuplọnmẹ dagbe lẹ ji taun, bo jo aliho wekinkan tọn etọn he bọawu bo dọnmẹ lẹ do; amọ mí gán yí hodidọ etọn se dọdọ e nọ yí sọwhiwhe do dè hosọ lẹ sọgbe hẹ numimọ he ewọ lọsu ko tindo, to whedelẹnu loo, e nọ dọ linlẹn etọn gando ninọmẹ de go poun. Na ehe wutu, e sọgan yin pinpọnhlan di dowatọ de to adà wekinkan to jọwamọ-liho tọn mẹ, podọ nugbo he sọgbe hẹ whenuho ehe yidogọna nuhọakuẹ-yinyin etọn. Na owhe susu lẹ, ewọ wẹ yin mẹhe diyin hugan wekantọ Spain-nu lẹ mẹ, podọ awubla he okú etọn to Seville hẹnwa to azán 7tọ Lidosun 1877 tọn hẹn ẹn họnwun dọ nugbonọ-yinyin etọn gbẹ dọn ayidonugo wehiatọ he tindo ojlo to kandai lẹ po nuyiwa po walọyizan otò tọn lẹ po mẹ tọn.

Bẹplidopọ azọ́n etọn lẹ tọn yin apadewhe Colección de escritores castellanos tọn: otàn gbẹzan tọn he yọ́n-na-yizan he yin kinkan gbọn Gabriel Ruiz de Apodaca dali wá diọtẹnna Últimas producciones de Fernán Caballero (Seville, 1878).