Epikule Lẹ Po Stoiki Lẹ Po

Epikule lẹ po Stoiki lẹ po yin hodotọ tamẹnuplọnmẹtọ voovo awe tọn. Depope to pipli awe lọ lẹ mẹ ma yise to fọnsọnku mẹ. Epikule lẹ yise dọ yẹwhe lẹ tin, ṣigba yé dọ dọ yẹwhe lẹ ma tindo ojlo to gbẹtọvi lẹ mẹ podọ yé ma nọ wà dagbe kavi sayana gbẹtọvi lẹ, enẹwutu nuhudo ma tin nado hodẹ̀ kavi sanvọ́ hlan yé. Epikule lẹ nọ pọ́n gbẹdudu hlan taidi nuhe yin nujọnu hugan to gbẹzan gbẹtọ tọn mẹ. Nulẹnpọn po nuyiwa yetọn lẹ po ma nọ do nujinọtedo walọ dagbe tọn hia. Ṣigba, yé nọ na tuli hagbẹ yetọn lẹ nado nọ jlẹkaji, na mọwiwà na gọalọna yé nado dapana nuhahun he gbẹdudu zẹjlẹgo nọ hẹnwa lẹ. Yé nọ plọnnu kiki nado duto obu po otangblo sinsẹ̀n tọn lẹ po ji. To vogbingbọn mẹ, Stoiki lẹ yise dọ onú lẹpo yin apadewhe yẹwhe dablu de tọn podọ ehe mẹ wẹ alindọn gbẹtọvi tọn wá sọn. Stoiki delẹ yise dọ alindọn na yin vivasudo to pọmẹ po aihọn po to gbèdopo. Stoiki devo lẹ yise dọ yigodo-yinukọn alindọn na wá lẹzun yẹwhe dablu ehe. Sọgbe hẹ tamẹnuplọnmẹtọ Stoiki lẹ, osẹ́n jọwamọ tọn lẹ hihodo wẹ nọ hẹnmẹ tindo ayajẹ.