Regina Twala
|
Cet article est écrit en Gun (Gungbe) |
Regina Gelana Twala yin jiji to 1908 to eNdaleni, Afrique du Sud, yinkọ etọn to whenue e yin jiji wẹ Regina Dorris Mazibuko. E kú to 1968. E yin mẹde he nọ hoavùn na jlọjẹ yọnnu lẹ tọn, e yin wekantọ de, nuplọnmẹtọ, dodinnanutọ, podọ yẹwhehodọtọ de ga. E hoavùn sọta gandudu yovo tọn to Afrique du Sud podọ to eSwatini. Regina yin mẹde he bí taun bosọ bikàn to tonudidọ mẹ. E gọalọ nado bẹ tonudọgbẹ́ de jẹeji. Ewọ wẹ yin yọnnu dopo gee he blavo to vòbibla he wá aimẹ to 1963 whenu.
Otàn gbẹzan tọn
[jlado | jla asisado]Vuwhenu
[jlado | jla asisado]Regina Dorris Mazibuko yin jiji to 1908 to eNdaleni. E wá sọn whẹndo Zulu tọn de mẹ. E whẹ̀n to lẹdo pẹvi de mẹ he mẹhe nọ nọ̀ finẹ lẹ nọ yì ṣọṣi Méthodiste tọn. Onọ̀ etọn he nọ yin Muriel Majozi wazọ́n to Durban taidi mẹhe nọ penukundo whégbè go de.
Wepinplọn po azọ́n po
[jlado | jla asisado]E fó Indaleni Girls' High School to 1924. E wazọ́n ganji to wehọmẹ. Enẹgodo e plọnnu nado lẹzun mẹplọntọ to Adams College, he yin wehọmẹ mẹdehlan lẹ tọn de.
E jẹ azọ́nwa ji taidi mẹplọntọ de to wehọmẹ hoho etọn to eNdaleni. To bẹjẹeji owhe 1930 tọn lẹ whenu, e nọ kanwe na linlinwe de he nọ yin Bantu World, bo zan tẹnmẹyinkọ lọ "Mademoiselle" to finẹ. To 1935, e sọ kanwe na linlinwe devo he nọ yin Umteteli wa Bantu, bo zan tẹnmẹyinkọ lọ "Sister Kollie" to finẹ. E mọ nunina susu yí na azọ́n etọn.
Gbẹninọ to Johannesburg
[jlado | jla asisado]To 1936, e dà Percy Kumalo to Johannesburg, yèdọ dawe de he nọ wazọ́n to fie yé nọ kùn sika te. To finẹ, e wazọ́n to wehọmẹ mẹdehlan lẹ tọn de, mahopọnna dọ mẹsusu to whelọnu do linlẹn lọ dọ asuwhesi lẹ ni nọ nọ̀ whégbè poun.
Azọ́n
[jlado | jla asisado]Regina Twala yin dodinnanutọ de. E plọnnu gando yọnnu lẹ po aṣà mẹyuu lẹ tọn po go. E sọ hùn wesẹdotẹn de na yọnnu lẹ.
E kanwe na linlinwe susu lẹ. delẹ to yé mẹ wẹ Umteteli wa Bantu po Izwi lama Swazi po. Tẹnmẹyinkọ voovo lẹ wẹ e zan to whenue e kanwe, tẹnmẹyinkọ etọn lẹ wẹ Mademoiselle, Gelana, po Sister Kollie po. Owe etọn susu wẹ ma ko yin zinzinjẹgbonu whẹpo e do kú.
E hoavùn sọta gandudu yovo tọn. Omẹ nukundeji de wẹ e yin na tonudidọ Swaziland tọn. To 1960, e gọalọ nado do tonudọgbẹ́ de ai to Swaziland.
E blavo to vòbibla he wá aimẹ to 1964 whenu to lẹdo Manzini tọn mẹ. Ewọ wẹ yin yọnnu dopo gee he tọ́n to vòbibla lọ whenu, amọ́ e ma ma du to vòbibla lọ ji.
Okú etọn
[jlado | jla asisado]Regina Gelana Twala kú to 1968, ojlẹ vude whẹpo Swaziland do jẹ mẹdekannu.
Alọdlẹndonu lẹ
[jlado | jla asisado]