Georgiana Viou/guw-bj

Gun (Bénin)

Gun (Gungbe)

Cet article est écrit en Gun (Bénin)

Georgiana Viou nyí jiji to 1977. É wá sɔ́n Bénin, cigbǎ é nɔ nɔ̀ France. Núɖùɖù-datɔ ɖé wɛ é nyí, é nɔ ɖà núɖùɖù yovo tɔn lɛ. To 2023, é lɛzun nyɔnu mɛyuu tintan xe mɔ nunina Étoile au Guide Michelin tɔn yí to France. Nunina ɖaxo ɖé wɛ exe nyí ná núɖùɖù-datɔ lɛ. Georgiana sɔ nyí hwɛdatɔ ɖé to agbàhwinhwlɛn nudidá tɔn ɖé xe nɔ nyí yiylɔɖɔ MasterChef tɛnmɛ. Kpóɖɔ, é kàn owě xe yè nɔ yí dó kplɔ́n nudidá ɖé.

Otàn Gbɛzǎn tɔn

Vuhwenu kpó wekpinkplɔ́n kpó

Georgiana Viou nyí jiji to 1977 to Cotonou, Bénin. To hwenue é gbɛ nyí yɔkpɔvu, é kplɔ́n lexe yè nɔ ɖà núɖùɖù dó to onɔ̀ etɔn ɖé. É wá sɛtɛn yì Kparis to hwenue é dó oxwe 22 nadó yì wexɔmɛ dógɔ́. Ojlǒ etɔn wɛ nadó lɛzun lɛdógbeɖevomɛ bayitɔ ɖé. To hwenue é ji ovi etɔn tintan godo, ojlǒ etɔn nadó nɔ ɖà núɖùɖù sɔ fɔ́n hwlaɖokpó dógɔ́. É jɛ azɔ̌n wà ji to núɖùɖù-satɛn ɖé.

To hwenue é fó wexɔmɛ godo, Georgiana sɛtɛn yì Marseille. É nɔ wazɔ́n to wekantɛn ɖé to okle kpóɖɔ to núɖùɖù-satɛn lɛ to zánmɛ. Finɛ wɛ é kplɔ́n núɖùɖù didá te. Georgiana ma yì wexɔmɛ núɖùɖù ɖiɖà tɔn. É kplɔ́n éɖé lexe yè nɔ danú gbɔn. É ɖɔ ɖɔ azɔ́nwiwa to núɖùɖù - satɛn lɛ to Marseille wɛ nyí fie emi kplɔ́n nǔxe emi nywɛ lɛkpó te.

Azɔ̌n nudidá tɔn

To hwenuena Georgiana tindó oxwe 33, é basí ɖiɖe nadó ɖoalɔtena lɛdógbeɖevomɛ bibasí, bo jɛ núɖùɖù-ɖiɖà-zɔ́n wà ji to gigɔ́ mɛ.

To 2008, Georgiana sɔawuxya to televiziɔn ji hwla tintan. Tito televiziɔn ji tɔn ɖé xe nɔ nyí yiylɔɖɔ "Un dîner presque parfait" ji wɛ é sɔawuxya te. Hɔ́ntɔn etɔn lɛ ná ɛn tuli nadó tɛnkpɔn bo yì tito televiziɔn tɔn ɖévo xe nɔ nyí yiylɔɖɔ MasterChef ji. É wazɔ́n lɔ ganji bosɔ kpénugo nadó jɛ adà godo tɔn tito lɔ tɔn mɛ.

To 2011, Georgiana xùn wexɔmɛ núɖùɖù ɖiɖà tɔn etɔn kpó núɖùɖù - satɛn etɔn kpó. É nɔ nyí yiylɔɖɔ "L'Atelier de Georgiana". To oxwe enɛ ɖokpólɔ mɛ, é wlan owě núɖùɖù tɔn etɔn tintan. É nɔ nyí yiylɔɖɔ "Géorgiana - Ma cuisine de Marseille". Núɖùɖù yovo tɔn wɛ é nɔ ɖà, amɔ́ é sɔ nɔ yí nuɖalɔ otò xe mɛ é wá sɔ́n tɔn, Bénin, dógɔ́ ná nudidá etɔn. To 2015, Georgiana xùn núɖùɖù-satɛn yɔ́yɔ́ ɖé xe nɔ nyí yiylɔɖɔ Chez Georgiana. Cigbǎ é blawu ɖɔ oxwe ɖokpó kpoun godo wɛ é súhɔ̀n. É tindó ɖɛ́sɔ-ɖɛ́mɛ lɛ xɛ mɛxe gɔalɔná ɛn nadó xùn núɖùɖù-satɛn lɔ lɛ.

Rouge

To Georgiana xùn núɖùɖù-satɛn yɔ́yɔ́ ɖévo to to Nîmes xe nɔ nyí yiylɔɖɔ "Rouge". To Rouge, é mɔ nunina titewungbe ɖé yí xe nɔ nyí yiylɔɖɔ Grand de Demain sɔ́n Gault & Millau si. To oxwe ɖokpólɔ mɛ, Georgiana kàn owě núɖùɖù tɔn etɔn awetɔ. É nɔ nyí yiylɔɖɔ "Le goût de Cotonou, ma cuisine du Bénin". Owě exe ɖɔxodó núɖùɖù xe wá sɔ́n otò etɔn mɛ, Bénin lɛ ji.

To 2022, é lɛkɔyi tito televiziɔn ji tɔn lɔ ji. Cigbǎ to ojlɛ exe mɛ, é ma nyí agbàhwlɛntɔ ɖé gba. Hwɛdatɔ ɖé wɛ é nyí to tito xe dinyi tawun lɔ, MasterChef ji.

To 2023, núɖùɖù-satɛn Georgiana tɔn, yèɖɔ Rouge, mɔ nunina vonɔtawun ɖé yí - Étoile au Guide Michelin! Georgiana wɛ nyí ogán azɔ́nxwé lɔ tɔn. Exe zɔ́n bɔ Georgiana wɛ nyí nyɔnu mɛyuu tintan to France xe mɔ nunina Étoile au Guide Michelin tɔn yí. Ewɔ wɛ sɔ nyí nyɔnu ɖokpó gee xe wazɔ́n éɖeco nadó yí nunina exe to oxwe lɔ mɛ.

Owě etɔn lɛ

• 2011 - Géorgiana - Ma cuisine de Marseille ISBN 978-2357200647
• 2021 - Le goût de Cotonou - Ma cuisine du Bénin ISBN 978-2379450655